Hun rei tak nurse indaih lohna avangin Champhai District Jail-ah nurse thawk an awm tawh lo a. Champhai South Bialtu MLA, Lt. Col. Clement Lalhmingthanga (Retd.) chuan Joysie R. Lalrempuii D/o Lalramzauva chu 2.11.2026 (Thawhtanni) atang khan MLA Fund atanga hlawh pein District Jail-a thawk tur hian an ruai.

Ruah sur nasat avanga Aizawl chawmtu tui pump tur lak luhna hmun chirh dumin a hnawh vek avangin tui pump mumal theih a ni lo a. Kar khat chuang chirh hi tihfai niin, zanin (27.10.2026) zan dar 6:15 atang khan pangngai takin tui pump leh theih a ni tih PHE Department chuan thuchhuah siamin an tarlang.

Zarkawt Local Council chuan thuchhuah siamin, tun hnaiah High Field kawmthlang velah nungcha humhalh (Wildlife Protection Act, 1972) lai ngau hmuh a nih thu an tarlang a. Ngau hi ei tur zawngin chenna in hnaih tak takah te an vak lut thin a, lo tithlabar emaw, tina emaw, man tum zawnga tumahin kut thlak lo turin mipui an hriattir a ni.
Ngau hian heti lai chhehvela mite a tibuai a, nunphung a tihbuai chuan Local Council hriattir turin an hriattir a ni.

Vawiin 23.10.2026 (Zirtawpni) chawhma dar 11:00 ah khan Chairman thar Lalrawngbawla Hrangchal hnuaiah Sinlung Hills Council session neih a ni a. He session-ah hian opposition lam ZPM party-in No Confidence Motion an put luh chu Chairman-in pawmin, naktuk chawhma dar 11:00 ah tuna SHC a sawrkarna chelh mek MNF party chu bukin an awm dawn.

Zanin atangin Leisekawt Field, Serchhip-ah 'Ram Pum Huap Kohhran Pavalai Pawl Intawhkhawm Vawi 7-na' an hmang tan a. Zan dar 8:00 thleng khan palai inziak lut 4138 an awm tawh.
Palaite hian motor lian (HMV) 49, motor te (LMV) 747 leh two wheeler 73 hmangin Serchhip hi an pan a ni.

Mizoram Truck Driver Association-in Kolasib leh Bairabi inkar kawngpui chhia avanga tun thla ni 6 atanga buhfai phur trcuk tlan loh an tih chu vawiin atang khan an tlan leh tan.
Mizoram Truck Driver Association chuan Kolasib leh Bairabi inkar kawngpui chu buhfai phur tan tlan ngamna a ni tawh loh avangin an tana tlan ngamna tawka kawng siam a nih hma chu tun thla ni 6 atang khan an tlan thei rih dawn lo tih an sawi a. Kawngpui chhe zual lai, lirthei tluk hlauhawm zual chu hnawh a nih tak avangin Kolasib leh Bairabi inkara buhfai phur tlan loh an tih chu vawiin atangin an tlan leh tan tih an sawi.
Kawngpui khuar neuh neuh la awmte pawh hnawh tur a nih bakah vil zui zel a nih dawn avangin Mizoram Truck Driver Association chuan PWD thawktute chungah an lawm hle tih an sawi a ni.

Aizawl Traffic Police chuan September ni 22 atang khan 70th Batch Mizoram Police Constable, Traffic Unit, Aizawla probationary course hmang mekte nena tanghoin traffic dan bawhchhiatna titlem turin zan lam leh Pathianni chawhnuah te Special Drive a kalpui thin.
Hei bakah hian khawpui laili leh daifem lama traffic jam thlen thei, dan phal lohna hmuna lirthei dah dap chhuah hna pawh kalpui zelin, lirthei hnuh sawn ngaite pawh a theih ang anga hnuh sawn thin a nih thu an sawi. Vantlang kawngpuia midang tana hnawksak taka lirthei dah lo tur te, mipui kea kalte leh lirthei veivakte tana harsatna thlentu ni lo turin lirthei neitu leh khalhtute an chah thar bawk a ni.

Champhai Winery chuan kumin chhungin grape wine litre 75,000 a siam chhuak tawh a, heng atang hian Rs. 6,54,00,000 an lei chhuak tawh.
Hnahlan Winery pawhin kuminah grape wine litre 80,000 lai siam chhuak tawhin, heng atanga an sum hmuh chhuah tawh chu Rs. 3,00,00,000 a tling tawh a ni.

Ruah sur avanga Kawnpui leh Mualkhang inkara chirhdiak luan luh vanga Bairabi leh Sairang inkar rel tlan chawlhtir chu thenfai a nih hnuah zanin dar 7:00 aṭangin Sairang-Guwahati rel a tlan leh thei dawn ta. Zin veivak tangkhangte puih nan Bairabi-ah bus 20 ruahman a ni a, JCB leh mi 50 chuangin rel kawng hi an tifai a ni.

Land Revenue & Settlement Minister Pu B. Lalchhanzova chuan Ramhlun Sports Complex-ah mi 127 leh Zemabawk West-ah mi 96, an vaiin mi 223 hnenah Record of Rights (ROR) a hlan. Minister chuan mipui ban phaka awm an tum thu sawiin, e-RAM kalphung thar leh ram sq.m 5,000 hnuai lamah DC-te thuneihna pek an nih thu a sawi bawk.